Primer trabayu discográficu d'esti grupu que nel so repertoriu inclúi cásique too temes tradicionales nos que la parte vocal xuega un papel fundamental, una novedá nel panorama folk asturianu, onde son mayoría les formaciones instrumentales. Tonada, vaqueires, añaes y composiciones propies, ensin escaecer los temes festivos dafechamente asturianos, y l'inxerimientu na música d'otres aries céltiques europees. Too ello cantao por Cecilia Allende y Jose María Aladro con sensibilidá fina, ye lo que nos ufierta Cuerria en « Al bellume la biesca », aire fresco pal folk asturianu de la fin del mileniu.