La banda de gaites «Cántara» de La Espina (Salas), dirixía pol folclorista y gaiteru Gustavo Eguren dende la so fundación en 1984, caltién una estética estremada de les formaciones clásiques de gaites, tambores y bombu. A esti conxuntu d'istrumentos xúnense sigún lo necesiten les igües de los temes: los curdiones piano, panderetes y pandeiros, batería, clarinete, flauta travesera..., y inclusive instrumentos electrónicos como guitarres, baxos o sintetizaores.

Los oyentes puen decatáse nos sos discos de la llínia d'evolución que sigue'l grupu. Dende los temes tradicionales adaptaos pa banda de gaites o la collaboración con bandes de música, al averamientu al folk, les nueves músiques o a los soníos más contemporáneos. Con esa fin tienen trabayao con «Cántara», compositores asturianos de prestixu como Antolín de la Fuente o Ramón Prada.