El multiinstrumentista Jorge Méndez ye al empar ún de los más versátiles ya heterodoxos músicos asturianos d'anguaño, y asina tien participao en grupos de rock, folk, fecho llabor de producción... Los dos discos qu'ufiertamos nel nuesu catálogu tienen como base l'organu barrocu, un instrumentu centenariu que nes sos manes camúdase en contemporáneu por mor del so precuru en buscar nueos climas ya sensaciones: dende la música minimal de «La Danza de los Murciélagos» o la esplosión sonora de «La Bagad» o «Fantasía Asturiana», del primer discu, a la «Suite Mitolóxica Asturiana» del segundu, na que debuxa dalgunos de los principales personaxes de la mitoloxía asturiana desenvolviéndose ente l'impresionismu y la música new-age, ensin escaecer los pasaxes rítmicos. Too ello con un resultáu sorprendente y dafechamente actual.