Tres diez años ensin grabar en solitariu, ve la lluz esti nuevu discu del cantautor asturianu Carlos Rubiera. Un nuevu discu y una nueva voz, porque nesti tiempu Carlos Rubiera desendolcó dafechu un rexistru de barítonu llíricu que mos amuesa en dellos temes. El discu, editáu en formatu de CD-llibru, ta dedicáu a la memoria del gaiteru Manolo Quirós, y amás del tema del mesmu nome, ábrese -y piésllase- con una versión n´asturianu del famosu ´Viaxe a Ítaca´ de Lluis Llach, inclúi cantares tradicionales como ´Ayer díxome to padre´ o ´Arrimadín a aquel roble´, y ente les composiciones destaca la ´Cantata Mariñana´, d´inspiración clásica y dividida n´Habanera, Oratoriu y Alborada. Les igües del discu tán al cargu de Gabino Antuña.