FONOASTUR ye una compañía discográfica fundada en 1987 con unos oxetivos definíos: la defensa, promoción y espardimientu de la música asturiana.

A resultes d'ello, tenemos editao nestos años grabaciones de los más estremaos xéneros musicales, pero sobretoo de música tradicional y folk, aidando d’esta miente al desendolque y afitamientu d'una creativa xeneración de músicos que tan prestosamente son a construyir un día con otru la nueva tradición musical astur. Con esi envís procuráremos ufierta-yos los medios técnicos que garantizaren un soníu de calidá, y diseñáremos amás una llínia estética que, en respetando la personalidá de cada artista, amosare a les clares cuala ye la tierra d'onde surden les nueses producciones. Pa finar, l'asturiano –sacante perpoques escepciones– foi la llingua principal emplegada na nuesa llínia editorial. Nun podía dexar de ser asina dau'l compromisu dafechu de FonoAstur con Asturies y los sos raigaños culturales. Esa ye la razón fonda pola que, dende va un tiempu quisimos xunir la espresión «La música del país» a la nuesa imaxe de marca.

Perpasaos ya los cien títulos asoleyaos, escosada cuantayá la nuesa primera rellación de discos, y el que de contino nos pidieren un catálogu xeneral actualizáu, animónos a iguar esta nueva edición na que s'arrecueyen los CD y cassettes en distribución n'esti momentu. A títulu informativu incluyimos al final un llistáu de les referencies en vinilo y/o cásique esgotaes qu'inda tan a disposición del público.
Na nos prestaría más qu'esti catálogu resulte d'utilidá. Con esi enfotu lu asoleyamos.

C/ Cardenal Cienfuegos, 2 – Escalera 2- Bajo B
33007- OVIEDO
Tfn. / Fax: 985/ 278050

E- mail: info@fonoastur.com
Tienda: ASTURSHOP: www.asturshop.com
Sitiu d’escucha: www.vitaminic.es

Clave de catálogu: FA.CD pa los cd’s; FA.C. pa los cassettes.